August 15

MARIA NFEK THARMIYE

GIN MON E BABIYOR

            Revelation 11: 19a; 12:1-6a, 10ab

E bang e Babiyor ko Revelation

      Me mab e Tempel rok Got u tharmiy, ma fare Kahol ko M'ag rok Got e ni guy u lan e Tempel rok.

     Ma aram me m'ug reb e pow ni ba ga' u lan e tharmiy, ni be' ni bpin, ni mad rok e yal' ma ba' e pul u tan e rifrif u ay, ma ke te' eliyaw nga ragag nge  l'agruw i t'uf.  Ni be n'en ni nge gargel, mi i yor ni ba ga' laman ni bochan e amith nge gafgow nma yib ngak e gargel.

     Miki m'ug reb e pow u tharmiy, ni ba dragon nri ba ga' nib rowrow ni medlip lolugen ma ragag e gagey rok, nra reb i lolugen ma bay reb e te'eliyaw riy. Me girngiy ba guruy u dalip e guruy ko t'uf u lanelang nga p'ebuk' nge yin' nga daken e fayleng. Me sak'iy ngam'on rok fare pin me longuy fak. Ma aram me gargeleg fare pin bochi pagel, ni ba ley i wasey e bayi gagiyegnag urngin e pi nam ngay.

     Machane min leag fare tir  ngan fek ngak Got nga tagil' Got. Me mil fare pin nga daken e ted ko gin ke fal'eg Got rogon ni nge par riy.

     Mu gu rung'ag ba lam ni ba ga' u lan e tharmiy ni be ga're, " ke taw ngal'an ni nge thapeg Got e girdi' ngak! Chiney e ke dag Got gelngin ni ir e Pilung! Chiney e ke dag e Messiah rok gelngin!

Ireray e Thin ku Somol  

PSALM:         Ps 45:9,10,11,15

R+   Nga ba' ni mat'aw rom e ba sak'iy fare bpin riy nib nunuw ko tin thabi fel e gol'.

Nga ba' ni mat'aw ko chiya rom e ba sak'iy fare bpin ni leengim riy, nib nunuw ko tin thabi fel' e gol.

R+   Nga ba' ni mat'aw rom e ba sak'iy fare bpin riy nib nunuw ko tin thabi fel e gol'.

Leengin e pilung, motoyil ko n'en nggog, mu pagtilin e girdi' rom nge pi girdi'em.

R+   Nga ba' ni mat'aw rom e ba sak'iy fare bpin riy nib nunuw ko tin thabi fel e gol'.

Fare pilung e ra yim' ni bochan fanam pidorang; i ir e masta rom, ere thingar um fol rok.

R+   Nga ba' ni mat'aw rom e ba sak'iy fare bpin riy nib nunuw ko tin thabi fel e gol'.

Rabad ni yad ba felfelan' ngalan tafen e pilung.

R+   Nga ba' ni mat'aw rom e ba sak'iy fare bpin riy nib nunuw ko tin thabi fel e gol'.

GIN LAGRUW YANG E BABIYOR

                                  1 Kor 15: 20-27

Ngad rungaged e Thin nib fel ni fek ko gin som'on  e babiyor ni yoeley Paul nga yaen ko girdi'en e glasia nu Korinth

     Pi walageg ni pumoon  nge ppin:

     Machane bin nib riyul' e ka ni faseg Kristus ko yam', ni aram e mich riy ni pi'in karm'ad e bay ku ni fasegrad ko yam'. Ni bod rogon ni yam' e yib ni bochan ta'reb e girdi', e aram rogon ni fos ko yam' e yib ni bochan ta'reb e girdi'. Rogon nma yim; urngin e girdi' ni bochan e yad ta'ab girdi' Adam, e aram rogon ni gubin e girdi ni bay ni faseg ko yam' ni bochan e kar ta'ab girdi'gad Kristus; nib yaram nike tay Got; ni Kristus e som'on ni ngan faseg ko yam; me miged e pi'in girdi'en Kristus ko ngiyal' ni bayi sul Kristus riy. Ma aram e bayi taw ko tungun: mi Kristus e bayi gel ngak urngin e pi kan ni be gagiyeg, nge pi'in yad be tay murung'agen ban'en, nge pi'in yad be yog e thin, me pi' Kristus urngin ban'em ni be gagiyegnag ngak Got ni Chitamangiy. Ya Kristus e thangri mang ir e i gagiyeg nge yan i mada' ko ngiyal' nike gel Got ngak urngin e pi to'ogor me ta'rad nga tan e rofrif u ay. Ma bin th'abi tomur e to'ogor ni nge gel ngak e yam'. Ya be yog e babyor nib thothup ni be ga'ar, "I Got e ke tay urngin ban'en nga tan e rifrif u ay." Ma rib tamilang ni re bugithin nem ni be ga'ar  "Urngin ban'en" e gathi ke uneg Got ngay, ni ir e ke ta' urngin ban'en nga tan pa' Kristus

           Ireray e Thin ku Somol

GOSPEL             Lk 1:39-56

Alleluia

 

+Alleluia, Alleluia

Maria e kanfek nga lang nga tharmiy; pi engel e yad be tolul nag e felfelan!

+Alleluia

     Ngad rungaged bang ko Gospel nib thothup ni yoloey Luke.

     Meyan ni e rran nga tomuren me fal'eg Maria rogon nge yan nib gur gurnga bangi n'en ni yigo'o burey nga bbinaw ni bay u lan yu Judea. Me yan ngalan e naun rok Zakariah ni nge guy Elizabeth. Ma fa'ani rung'ag Elisabeth laman Maria ni be non, me mithmith fare tir u yin. Me sugnag fare Kan Nthothup Elisabeth, me non ni ba ga' laman ni ga'ar "I gur e ke fal'eg Got  wa'atham u fithik' e bpin! Ma ke fal'eg Got wa'athan e re tir ni bay mu gargelnag! I gag e mang nike yib chitingin e Somol rog ni nge guyeg? Ya yugu napan ni gu rung'ag lamam me mithmith e re tir ney u yinag nike felfelan'. I pagan'um ngak Somol ko tin ni yog ni bay rin' ngom aram fan ni kari mfelan'! Me ga'ar Maria: "Kari gog e sorok ngak Somol u laninug; ke felan'ug ni bochan  Got ni Tabiyul rog. Ya ke leam nigeg, I gag e re Tapigpig rok ni gub sobut'! Ma chiney i yan ngaram e bay i yog e girdi' ko urngin e mfen nike fal'eg Got wa'athag, ni bochan e pin'en ni yira ngat  ngay nike ri' Got ngog, ni Got nib th'abi Gel Gelngin. Ma fithngan e ba thothup;ma runguy urngin e pi'in bay madgun u wun'rad u reb e mfen nga reb. Ya pa' nib gel e ke k'iyag ke wereg e girdi' ni yad be ufanthin u lanin' rad ko tin ni kem'ay i leamnag rorad ni ngar ngongliyed. Pi pilung ni ba ga' lungurad e ke chuwegrad u tagil' rad, ma ke tolangnag e pi'in nib sobut'. Ke pi' e tin ni bfel' ban'en ngak e pi'in yad be yim' ko blig; ma ke pag e pi'in pire' ban'en rodad karanod ndariy ban'en u pa'rad. Ma tin ni yog ngak pi chitamangidad ni bay rin' e ke rin; ke yib i ayuweg e tapigpig rok i Israel, ma de pag talin ni nge runguy Abraham nge urungin e pi'in owchen Abraham ndariy n'umngin nap'an!" Me par Maria rok Elisabeth ni gonap'an e dalip e pul, me sul nga tabinaw rok. 

      Ireray e Gospel ku Somol